المجد لله...
كلمة ونص..
الدير و الكنيسة بيت الله والناس كل الناس من دون تمييز...
من كم يوم فتحنا ديرنا لاهلنا اللبنانية ابناء الجنوب المجروح والمصلوب ع جلجلة المصالح والحروب جوا و برا....
وانا مش بصدد ادخل ب شيطنة السياسة و ع مين الحق او مين السبب...
الكلمة لي رح قولا لكل لبناني بيحب وطنه وبيآمن برسالة السما والإنسانية.
لي صار ما ذنب الناس فيه، الكل عندو انتماء سياسي وحزبي، والكل الكل غلطوا بحق وطنن...
قتلنا بعضنا كرمال كرسي وبعدنا للاسف، او نسينا شو عملنا وقتلنا ببعضنا وتشردنا ونذلينا، وضحكنا ع شعبنا كرمال مصالح الخارج ونسينا بلادنا لي عم ينذل وكرامة اهلنا لي نهانت وما حدا بيسأل...
والطمع لي عم ينهش بشعبنا، اجارات البيوت والتجارة بكرامات الناس والاهانات لي صارت موضة وساخة....
يمكن البعض يسبوني ويعملوني صهيوني وعميل، ويمكن البعض يطعنوا بمسيحيتي ورسالة ربي يسوع، عادي ما انا مين قدام لي نصلب وخانوه اقرب الناس اله.....
سمعوني يا هل الناس..
انا وقت فتحت بوابات الدير ما سألت حدا من الناس انتو شو ولا شو دينكن ولمين بتنتموا، الشي الوحيد لي شفتوا انن ولاد الله وولاد بلدي.
لي شفتوا، دموع الأمهات وحسرة البيات وخوف الولاد، والسؤال من الصغار، ابونا في ضرب هون، فينا ننام وما نموت، فينا نلعب وما حدا يسرقلنا حياتنا؟...????
ايه عم بقعد مع علي وحسين ومحمد وفاطمة وسيلين وكارول و.... وباكل معن وما طعنوا فيي ولا سبوني، و اكيد ما رح يعملوها لانن ولاد اصل...
فتحت الدير لان هودي اهلي وناسي، لانن ولاد الله ب غض النظر كيف بيعبدوه وبيصلولو، النبع لي بتشرب منو ما بيسألك انت مين ولا شو دينك، والكنيسة هي النبع...
أيه الناس لي ستقبلتن اطيب ناس و ولاد اصل، اذا في بعض الناس ما بيحملوا الوفى مش معناها الكل بلا اصل، وكلامي لكل الناس المسيحي قبل المسلم، ايه اللبناني طول عمرو أصيل...
أيه فتحت الدير وعرفت انو المسلم الشيعي بيشبهني ب انسانيته ومحبته...
وعرفت انو بيقعد معي ع طاولة الاكل، وبيحترم صلاتي وبيطلب مني صليلو للعدرا ومار شربل، ايه هودي الشيعة.
ايه وبالاكتر والأجمل انو كل لي بيشتغلوا معنا ب الدير عم يخدموا بكل محبة وإيمان برسالة الرب يسوع، وعم يشهدولوا بمحبتن...
ايه شفتن بيحبو يعيشوا ب سلام، ويفرحوا، ويربوا ولادن ع محبة لبنان، أيه هيدي الحقيقة...
ايه عم نتشارك سوى الضحكة والفرحة والحزن، والأجمل والارقى الصلا كل واحد ع طريقتو، بس هدفنا الوحيد محبة هل البلد...
ليكو يا لبنانيي...
انا راهب بس قبل كل شي لبناني...
انا كاهن بس قبل كل شي لبناني...
انا ماروني بس قبل كل شي لبناني....
بيكفي بقى تجريح ب بعضنا، واهانات، ولك شوفو الناس المذلولة ع الطرقات لي عم تتغطا بكرتونة وكيس قماش، ولك نحنا شووووووووووو؟
حتى معشر الشياطين عم يرحمونا اكتر ما عم نرحم بعضنا....
ايه فتحت الدير، ولو عندي بيت ودير وكنيسة بعد ت افتحن وقول لكل الناس اهلا وسهلا فيكن هيدي رسالة وانجيل ربنا يسوع، هيدا لبنان لي لازم نعيشو هيك وبالدير عم نعيشوووو...
ورح ارجع عيد وكرر، انا الراهب الماروني وما بستحي بكل كلمة قلتا، الشيعي والسني والدرزي اخوتي بالإنسانية، لانن لبنانيي....
دايما لله.
صارو اكتر من كلمة ونص، بس النص الكلمة الاخير لكل لبناني، حبوا بعضكن يا خلق الله، الله للكل ولبنان للكل وكلنا لبعضنا...
واخيرا الي الشرف إستقبل وعيش مع عيلة جنوبية...
ابونا بطرس..