المجد لله...
تكلم مارون...
يا ابناء مارون نسيتوا اصلكن...
ايه يا مارون، نسينا وتناسينا،
مجد لبنان نعطى الك، هيك قالولنا...
من سنين طويلة مرقت ع حضورك بهالشرق، ومن سنين اطول عشت ب جبل قورش وللبنان نتقلوا تلاميذك...
من سنين عتيقة راحت، عملوك بي الطايفة، وتسموا ع اسمك، موارنة بس للاسف بالاسم...
لكل ابناء مارون بلبنان ولي برااا اكتر، لكل ابناء كنيستي من اكليروس وعلمانيي ، وانا اولكن...
يتوجه بكلمة ت ترجعوا لاصالتكن و تردوا مجد لبنان لي بعتوه بعباياتكن المدهبة و كراسيكن المزيفة واطماعكن الضيقة...
مارون.، تكلم يا مارون..
الكلام الك، تفضل...
*يا ولادي لي ع اسمي تسميتو، شو عملتو فيي؟
شو عملتلكن، ت تاكلو بعضكن وتشوهوا اصالتي وتبهدلوني؟
شو عملتو ب بلدكن لي انتو اساسو؟
شو عملتو ب كنيستكن الرهبانية؟ وين شهادتكن؟
وين ايمانكن ل فتفت صخر الوديان و خلق منن مناسك واديار؟
وينكن يا اكليروس رهبان ورهبات، وينكن من فقركن وشهادتكن؟.
وينكن يا موارنة، كنايسكن صارت فاضية وشتاقت الارض لركابكن ومسابحكن، قولكن واعيين ع ايمانكن؟
شو عملتو ب أرضكن لي ارتوت بعرق جدودكن ومعاول رهبانكن، الارض لي ورتتوها عن لي مات كرمالا واستشهد ت تبقى ؟
شو عملتو، وشو عملتو؟...
وهون مارون سكت، ومعو حق يسكت...
عذرني يا مارون القديس...
موارنة اليوم نكروا اسمك وخانو رسالتك، ايه وانا منن. والله مستحي احكيك واتطلع بوجك، غريب يا مارون شو عم يصير...
تقاسمنا ع تياب طايفتك، ولبسناك اكليل عارنا ومصالحنا...
قعدنا بقصور مزينة ومذابح مدهبة...
ونسينا الارض لي كانت فراشك، والسما لحافك، والحجر يسند راسك...
مايدتنا حتارت بألوانها، وانت الخبزة كانت تشبعك...
تيابنا مزركشة والعصي من ذهب وقلوبنا تحجرت، و نسينا عبايتك الخشنة و عصايتك الخشب وقلبك لي كلو دهب...
لتهينا بالكرسي وب أجريا المكرسحين، ونسينا لبناننا وشعبنا الكسيح...
تهجرنا بهالدني وصرنا فيا مسؤولين كبار.، وبوطننا تشردنا من ذاوتنا وفيا صرنا صغار...
غريب يا مارون كيف قبلان بهيك مجد؟..
مجدك هو شربل ورفقاتو القديسين، الدويهي والبطاركة لي ركعو وصلو وكانو شهادة للعالمين، و وغيرن من الرجال الاحرار لي بصلاتن كانو كبار، وبإيامنا للاسف صرنا ندور ع الرجال...
سامحني يا بيي مارون، ومن طايفتك بعتذر وقدام كنيستي بحني عيوني وكياني مستحي
قدامك يا مارون...
عللي صوتك، قوي صرختك، ضرب بعصايتك، ورمي كلمتك بعقول ولادك و قلن:
ستحوا بقى، حرام عليكن تهينو تاريخكن ورسالتكن وهويتكن...
فوقوا رح يجي نهار وإجا إخجل منكن..
المجد لربنا ودايما لله...
ومجد لبنان ما بينعطى الا لشعب ب يصلي، ب يركع، ب يقدس، ب يشهد، وب يصرخ بوج كبارو و ذاتو...
ومن له أذنان سامعتان فليسمع ويفهم.
ابونا بطرس....