كتب الأب بطرس عاقوري:
المجد لله...
نبقى ونستمر...
هالكلمة مش شعار سياسي او حركة ثورية، وبعتذر من لي قالا، بس لازم قولا(نبقى ونستمر).
صباح الرب اخوتي...
حبيت هالنهار المبارك، اترافق معكن ع درب اختارا كتار من الناس، ومنن اهلي. مشروع كبير وعظيم مبني ع حب الله والآخر (الزواج)...
رح احكيلكن خبرية صغيرة عن شخص بحترمو و بقدرو، يسامحني رح إحكي عنو.
تجوزت هالطفلة بعمر الورد، غنوجة البيت ومين قدا، بس ضرب الجهل و دق جرس الحب، ويا ريت ما كان هالحب.
فكرت حالا رح ترتاح اكتر و تتتغنج اكتر، تكللت من حدا مش من بيئتا ولا لغتها بيفهم..
بالدموع ودعت بيا وإما، وإخوة ما فهموا شو القصة، رح تبعد عنن، بس هي اختارت والله يهنيا...
تزوجت سافرت مع هالحدا، زلمة وللأسف منو حدا،
الإيام كبرت والعمر تعدى سنينو، سافرت ت تعيش وتتهنا، بس الهنا ما لاقى لبيتا دربو...
بكيت والرجعة تتمنا، و زوجا ما كان قد حلما، همو امرأة ب بيتو وفهمكن كفاية.
بخل، قلة اهتمام، بغير عالم، عالكمبيوتر نهارو موصول بليلو...
صبرت تحملت وعانت، دموعا ما نشفو، نزلو حتى ستحو منا، المسبحة بإيد، والحسرة بإيد...
راحت بعيد حابة ترجع، ما وفرت لا شباك ولا حتى باب او كومة حجار تسند راسا، وكانت تقول: بدي ابقى واستمر....
الله بيدبر، هيك كانت تقول.
وما خلصت مسيرة الوجع، اجاها بنوت صغيرة تعزيا وتجير خاطرا، زوجا ما بقدر قول الا هو حدا بس منو حدا، نسي الكلمة لي قالا ع مذبح الرب: نعم.
وبالنهاية وصلو لمطرح ما بقى في لا نبقى ولا نستمر...
تأملت بحياة هالتنين، وقلت يا عمي الدني وين صارت، وين صار سر الزواج و وين صارت قيمتو؟...
كتار نكروا زواجن..
كتار رفضوا زواجن...
كتار خانو زواجن..
كتار تركو رجالن و العكس.
كتار من الرجال لاحقين اهلن، والنسوان كمان..
كتار فقدو الحب والتصحية،
بس الاصعب فقدوا الاحترام بين بعضن...
ونسيوا انو الله التالت بيناتن، وصارت روح الانانية متملكتن...
ما بعرف شو بدي إحكي و قول، في ظلم، ايه وبعرف كتار، ومنن هالصبية....
عم بسمع كتير. من الناس اليوم:
يا أبونا، ما بقى نقدر نعيش مع بعضنا، بدنا ننفصل، ونترك، بدنا نطلق...
وينو الله؟ منو شايف فقرنا؟ وجعنا؟ صليبنا؟ اوووف تعبنا....
بدي إرمي صليبي ت ارتاح، بدي دبر حالي...
(وقفوا تقلكن)
يمكن ما تفقتوا،يمكن الفقر بيخلق النقار، ويمكن ما بقى تعبيلك عينك او تعبيلو عينو، وبأسف على هالتعبير.
وولادكن شو ذنبن؟
هلقد كبرياءكن نساكن الشمعات لي زرعا ربنا ببيوتكن.
تذكرو في ناس ما عندن ولاد بس عايشين محبتن وايمانن ل زواجن....
رجعوا لربكن، تذكروا لي جمعوا الله ما بيفرقوا انسان.
مينك انت يا انسان ت تنكر كلمة الله؟
وعى بقى فيق، ترك الحب يغمرك، وتذكر كلنا ولاد تسع، ومن ذات الرحم جينا،رحمة الله...
الرب بجمعكن، كونوا عيلة وهو تالتكن..
ت تبقوا وتستمروا...
نهاركن مبارك...
ابونا بطرس...