صباح الخير والي المياه،
قلت بتوجهلك من الصبح بصباحية بالعامّيّة والمشبرح شكلك ناسينا هون بالمحاربية، يمكن ملتهي بشي مسبح؟
لخبّركم قصّة المحاربية، ضيعة ساحليّة بقضاء جزين، أهلها كبار بأخلاقهم، بيتحاشوا يعملوا مشاكل وبيآمنوا بمنطق الدولة، بيدفعوا كل الرسوم والضرائب من منطلق واجب عليهم مقابل حقوقهم...
أي حقوق؟ أبسطها المياه... مياه الشرب المسؤولة عنها مؤسسة مياه لبنان الجنوبي، ولكن...
ولكن متل كل فترة بيقرر والي المياه ينقطلنا اياها بالقطارة، بيديرها نصف ساعة على ضيعة مسكونة بأهلها صيفًا شتاءً، بتعرفوا بنص ساعة لازم تكون طافت الخزانات، لدرجة صاروا تجار "سيترنات المياه" بيجوا بيعبوا المياه من النبع عنّا بالضيعة ليبيعونا اياها على خزاناتنا... مهزلة ما هيك؟
ومش بس هيك هيدي النصف ساعة مرة أو مرتين بالأسبوع، يعني ضيعة عايشة على ساعة مياه بالأسبوع، بوقت...
بوقت ما المحاربية وعين المير متداخلين ببعضن، جيراننا بيشطفوا الزفت صبح وضهر وعشية، وصحتين على قلبهم، لأن هيدي أبسط حقوقهم بالمياه، السؤال كيف بتوصل على عين المير وبيتعبوا اجريها بالمشوار على المحاربية؟ كيف بتوصل على لبعا وما بتجي صوب المحاربية؟ هلق الريس بلبعا بيعز عليك أكتر منّا؟ لاي الماي صارت بالعواطف؟ كيف المسابح والـ RBNB طايفة بالمياه؟ من وين هالمياه أكيد مش من الليطاني ما هيك؟ بوقت ما أهالي المحاربية عم يدفعوا حق المياه 3 مرات؟ مرة لمياه لبنان الجنوبي ومرة للسيترنات ومرة لمياه الشرب من الشركات الخاصة ليقدروا يشربوا "ماي نظيفة".
ولاي موظف دولة مفروض انو معاشو من الضرائب اللي نحن عم ندفعها، مسؤول عن تنظيم المياه، بينطر الـ"ألو" لتوصل الماي عند المواطنين؟ شو واجباتو هو؟ مفكرنا عم نشحد حقوقنا؟ هيدي مسؤوليتو بزمن لازم يكون عنّا منطق دولة، فعيب بهيك "عهد" نكون عم نناشد ونطالب بحقنا بالمياه، أو انو صرنا بزمن "الماي على المحسوبية وحبيب القلب والرّيّس و"الأستاذ"؟
وهيدا الكلام موجه إلى وزير المياه جو الصدي، ومدير عام مؤسسة مياه لبنان الجنوبي الدكتور وسيم ضاهر...
هلق الدولة عندها معايير توظيف ما هيك؟ وبتلاحق الفاسدين وأصحاب الصفقات كمان ما هيك؟
نحن أصحاب حق، وكرامتنا خط أحمر لما توصل لأولادنا وأهالينا، ناطرين المياه تكون وصلت على خزاناتنا اليوم وكل يوم وفق منطق الدولة، لأن منرفض حدا يطلع عن طوع الدولة وياخد حقو بإيدو...
ابنة بلدة المحاربية قضاء جزين
الصحافية شيرين الياس حنا