المجد لله...
وبكرا شو. رح يتغير..
ايام وسنين من صنع ايدينا....
ايه، صنع ايدينا٢٠٢٥ و ٢٠٢٦ وغيرن....
ارقام عم ترقص وتقطف من عمرنا، نحنا خترعناها ونحنا لبسناها جسد ايامنا و اعوامنا، ومنقول شو عملتي فينا يا هالسنين؟ ونحنا لي صنعناها،
والإيام عم تمرق...
شو الفرق بين اليوم و بكرا، بين ٢٠٢٥واختا ٢٠٢٦ بيشبهو بعضن ومن رحم واحد, عمرنا....
كم ساعة وبتمرق سنة من العمر. ،منهيص، منفرح، منعيد، منصرخ، منشرب، منسكر، منكسر صحون، ويمكن ننسى نشكر ربنا عالايام لي مرقت...
شو اخدتي معك يا ٢٠٢٥, اخدتي احلام شعب وصرخة انسان، وتركتي لاختك جوع و وجع وشعب عم يشحد جنى عمرو، وناس عم تسابق الرغيف وتشحد ع بواب فاسدين اغتصبو كرامتن ومالن...
بكرا منطفي شمعة ومنضوي غيرا، بتقلب الساعة لحظة، وبتقوم قيامة الدني...
خلصت سنة و وصلت غيرا، وشو تغير؟
نحنا بعدنا نحنا، ما تغيرنا ولا تبدلنا ولا غيرنا شي...
لبنان بعدو مصلوب وشعبو مذلول ومستشهد ب ارضو وبين ناسو، والحكام عم يعيشو ع مال البلد المنهوب، ويسكرو عم دم شعبن..
غريب يا انسان، غريب يا ابن بلدي، عدك عم تركض ورا زعيمك و ع شو؟ قللي ع شو؟...
اكترية شعبك جوعان وعم يشحد اللقمة، وناس عم تبيع حالا ب هياكل الطوائف، استحوا بقى تركوا دينكم ل الله، وخليكن ب لبنان الواحد، ولك وين العدل؟...
يا انسان ل ٢٠٢٥ بشوفك بتضحك بتمرح وأخرتك صندوق مسكر معتم فاضي من كل شي الا منك...
بتعبي ارزاق وأموال، ورايح عريان فاضي, ولي جمعتو وينو؟
بتنهش بلحم ورزق وعرض ودين ومعتقد ودم غيرك لي هو لبناني متلك، وباﻵخر ارضك رح تنهشك...
بتتشاطر ع غيرك و بتسرقو و بتبلع مال غيرك و ورتة اهلك واخوتك، وبالنهاية الموت رح يسرقك...
بتلبس، بتاكل، بتشرب، وبتنام، وكلو مش الك....
جيت فقير وفالل فقير، طيب شو عملت بسنين عمرك؟....
بتفني صحتك ووقتك تتعبي جيابك، و وقت تكبر بتصرف مالك ووقتك تترد صحتك، وكلو صنع ايدك...
ايه يا رفيقي ايه، والله وين؟ وين مطرحو؟ ليش هاملو؟
بتسألو شو عملت مع الله وروحك؟.... بيقلك بكرا جايي هلأ مش وقتا. بدي عيش، انبسط، فرفش اسرح و امرح....
ايه نيالك نبسط وعيش، بس اللحظة لي جايي مش الك...
الساعة رح يكرجو صابيعا، والسنة رح يمرقو اياما، و شمعة العمر رح بتدوب و إلا ما تطفي بشي لحظة، وكلو صنع ايدك..
٢٠٢٥ راحت واجت ٢٠٢٦..
خلونا نستقبلا بالصلا والشموع ع سطوحنا وبيوتنا، والاهم ب قلوبنا...
ما تنسوا الله سيد الزمن، حياتنا منو و الو...
نتبهو من الدجالين والابراج والانبيا الكذابين، الله وحدو بيعرف الايام واسرارا..
دايما لله...
ينعاد عليكن وسنة مليان بركة وإيمان وراحة بال...
ابونا بطرس العاقوري…