المجد لله...
خللي قلمك يخفف المك...
(كلمتين حق، بحق القلم)
هدية لكل صاحب قلم صادق، ولكل صحافي امين.
بخاف منك، .بس بأمنلك...
بهرب منك ومن دونك ما الي هوية ولا اسم...
بخجل منك وبحبرك بحكي الحقيقة و لساني ما بيمل....
كل مرة بكتب فيك، بشوفك عم تخلص وينشفو عروقك، بقول لحالي: خلص اجا صمت الكلام، وبرجع بشوفك عم تكتب ودمك عم يسيل وراسك نرفع....
كل ما شوفك متت وغرق حبرك جواتك، بحس الدنيي وقفت و عقارب الايام ختيرت ع ورقة مزيفة....
يا قلمي من صغرتي عشقت خطك، كنت سميك خزنتي السرية...
فيك بكتب و بسكب اسراري، وفيك بمحي غلطتي واخطائي... يعني و اسمحلي قلك، كاهن انت و بتحمل سر..
فيك بتنكتب علامة نجاحي، وفيك بخجل من ضعف ادراكي...
يا هالقلم شو سرك، بتكتبنا وبترجع بتمحينا...
من وقت ما لمست ايدك وصار الشوق يكبر والحلم يوعا، وقول لحالي: بكرا جايي ورح صير اكتب...
كبرت وصرت حرتق بشوية كلمات مطيشرة (مبعثرة)...
ورحت اكتب فيك وجع الناس لي فيي، وصرت امحي بعيون الناس دموع بكرا لي جايي، و امسح دمعة مبارح لي غابت ع جرح اله اسمو: انا الكلمة....
يا قلمي كنت مبارح وانت اليوم وبكرا لما نكتب بعد....
انت وجعي وانت انا، بحبرك بخبر عن حالي، و بحبرك بشفي قلوب تعبانة، وبحبرك بعمل ثورة و بخلي الصورة تحكي...
كل ما احملك يا طفلي الصغير، بحس حالي مارد و رح قول اكبر....
قلمي يا رفيقي، منك حاسس انك رخصت ب ايدين ناس هانوا كرامتك وجرحوا بقيمتك؟...
يا قلمي, ما رح تموت.إذا نشف دمك، دمي رح يمشي بعروقك...
انا خلقت ت احكي واكتب و أصرخ، يا قلمي المجنون ....
متل معلمي لي خلقني، كان الكلمة لي نكتبت ب ايد الله، وفيك نكتب، وقالوا عنو مجنون..
انت القلم ورح تبقى، وأنا انسان و ب اﻻلم باقي...
يا قلمي، شو بحبك...
من هيك كل ما فرغت من حالي وضاع فيي الامل، برجع لقلمي ت امحي المي....
دايما لله..
لكل انسان حامل ب ايدو قلم، رفع راسك وقول: هيدا سلاحي، وبيبقى الامل....
ابونا بطرس..